Ադրբեջանի խորհրդարանը նոյեմբերի 26-ին քվեարկությամբ հաստատել է 2010թ. պետական բյուջեն: Եկող տարվա համար բյուջեն սահմանված է 10 միլիարդ 15 միլիոն մանաթի չափով:
Դա, մոտավորապես, հավասար է 13 միլիարդ ԱՄՆ դոլարի: Հիմնական մուտքերը,
որոնց հետ հույսեր են կապում ադրբեջանական իշխանությունները, պետական և
մաքսային հարկերն են (շուրջ 6.25 մլրդ դոլար) և պետական նավթային ֆոնդից
ստացվող եկամուտները (6.143 մլրդ դոլար): 2010-ին ևս որոշակիորեն
կավելանա Ադրբեջանի ռազմական բյուջեն` նախորդ տարվա ցուցանիշը 0.9%-ով
գերազանցելով և հասնելով 1.506 մլրդ դոլարի:
Ադրբեջանը, սակայն, լուրջ մտավախություններ ունի հատկապես այս օրերին
մեզանից ոչ շատ հեռում կատարվող ճգնաժամային փոփոխություններից: Արևելյան
պերճության խորհրդանիշ Դուբայի Էմիրությունը քայքայման եզրին է, և
հավանաբար, մենք դրան ականատես կլինենք 2009թ. դեկտեմբերի 14-ին, երբ տեղի
իշխանությունները չկարողանան մարել 80 մլրդ դոլար արտաքին պարտքի գոնե
50%-ը: Հակառակ դեպքում էմիրությունը բառի բուն իմաստով կքայքայվի`
անցյալում թողնելով Դուբայ` շքեղություն անվանումը: Ընթերցողներից քչերը,
թերևս, երբևէ այս մասին մտածած լինեն: Ո՞ւմ մտքով կանցներ, որ հավերժական
շքեղության էմիրությունը հանկարծ կկործանվի:
Եվ ահա, Դուբայի ճակատագրին արժանանալու հաստատակամ քայլեր է անում նաև
մեր հարևան Ադրբեջանը: Հաստատված պետական բյուջեով չնայած բավական ճոխ
ծախսեր են նախատեսված ֆինանսատնտեսական ճգնաժամի պայմաններում, սակայն
ծրագրերն ուշադիր ընթերցելիս ակնառու են դառնում բոլոր այդ ծախսերի
ֆինանսական աղբյուրները: Արդեն 3.3 մլրդ դոլարի արտաքին պարտք
ունեցող Ադրբեջանն այսօր էլ շարունակում է պարտքեր վերցնել տնտեսական
որոշակի խնդիրներ լուծելու համար: Հաջորդ տարվա բյուջեով
նախատեսված 13 մլրդ դոլարի եկամուտներին համապատասխան, ծախսերը կազմելու
են 14 մլրդ 80 մլն դոլար: Բյուջեի դեֆիցիտը 2010-ին կկազմի 1.561 մլրդ
դոլար: Այդքան գումար էլ արդեն Ադրբեջանի ֆինանսների նախարարությունը
նախատեսել է ստանալ արտաքին աղբյուրներից:
Ադրբեջանի իշխանությունները վստահաբար հայտարարում են, որ կարելի է
խոշոր պարտքեր վերցնել` համոզված լինելով, որ նավթի աստղային եկամուտների
հաշվին շատ արագ կմարվեն այդ պարտքերը, հասարակությունն էլ կուշտ ու
երջանիկ կլինի: Սակայն Դուբայի օրինակն այս օրերին կարծես թե ստիպել է
ադրբեջանցի պաշտոնյաներին` հայտարարություններ անելուց առաջ կծել սեփական
լեզուն: Ի դեպ, չնայած այս տարի էլ ավելացել է Ադրբեջանի ռազմական
բյուջեն, բայց ավելացումը շատ քիչ է նախորդ տարիների համեմատությամբ:
Ավելին` ադրբեջանցի, հատկապես, ընդիմադիր շատ պատգամավորներ կտրականապես դեմ են արտահայտվել ռազմական բյուջեի ավելացմանը: Ի՞նչ կարիք կա` առանց այն էլ ճգնաժամային տնտեսության պայմաններում, գումարներ ծախսել մի բանակի վրա, որն օրնիբուն զբաղված է ինքնաբռնաբարություններով:
Ռազմական անտեղի ծախսերի մասին խորհրդարանում` բյուջետային
քննարկումների ժամանակ խոսել է նաև «Ազգային ճակատ» ընդդիմադիր
կուսակցության ղեկավար Ալի Քերիմլին: Նրա խոսքով, եթե նույն
տրամաբանությամբ խոշոր գումարներ ծախսվեն, և փոխարենը` Ադրբեջանի
բանակն ստանա ֆիզիկապես ու բարոյապես մաշված ռազմական տեխնիկա, ապա լավ
կլինի մեկընդմիշտ մոռանալ լավ բանակ ունենալու մասին: Իհարկե, եթե ադրբեջանցիները գոնե քիչ թե շատ խելացի լինեին, պետք է, որ այդ մասին վաղո~ւց մոռանային երազել:
Նաիրի Հոխիկյան
ArmAr.am
|